Ji Gelê Me yê Welatparêz û Raya Giştî ya Demokratîk Re
Ji Gelê Me yê Welatparêz û Raya Giştî ya Demokratîk Re
Nasnav: Zîlan Bokan
Nav û Paşnav: Araziye Hesen Hemed Xidir
Navê Dayîkê: Ayşe Ebdulah Davûd
Navê Bav: Hesen Hemed Xidir
Dîrok û Cihê Tevlêbûnê: 20.1.2002/Qendîl-Bukrûska
Dîrok û Cihê Şehadetê: 17 Çile 2011/Herêmên Parastinê yên Medyayê
Têkoşîna azadiya Kurdistanê bi berdêlên pir giranbuha xwe gihandiye roja me. Ji destpêka têkoşînê heta niha bi deh hezaran keç û xortên vî welatî yên herî jêhatî di oxira azadiya Kurdistanê de şehîd hatine dayîn. Îro jî ji çar aliyan ve êrîşên qirkirinê li ser gel û welatê me tên sepandin. Çawa ku di raboriyê de fedayîyên azadiya gelê xwe li hemberî êrîşên dagirkeriyê bûn mertal îro jî li çiyayên Kurdistanê gerîlaya/ê azadiyê derbeyên herî kujer li dijminê hov dide. Divê baş bê dîtin ku dijmin evqasî lawaz bûye, ji hestiyên şehîdên me jî ditirse. Ji bo ku şehîd di bîra civakê de cihekî rasteqîn negirin her cure sepandinên dermirovî pêktîne. Lê çawa ku di destpêkê de helwesta herî mezin di aliyê xwedîderketina li bîranînên şehîdan de hat diyarkirin îro jî PKK li ser xeta Rêber Apo diyarkiriye helwesta herî xurt û afirîner di warê jiyandina şehîdan de diyar dike. Kêlî bi kêlî jiyanên hevalên şehîd zelal dike û wan dike hêmayeke herî zindî yê jiyanê. Têkoşîna li hemberî dagirkerî û nokeriyê li ser vê bingehê ber bi serfiraziyê ve diçe. Vaye yek ji van hevalên ku ji bo jiyaneke azad, welateke azad bûye helwesteke afirîner û li bilindahiyên çiyayên Kurdistanê bûye gerîlayek çalak hevala me Zîlan BOKAN e. Hevala Zîlan di 17´ê Çileya 2011´an de li Herêmên Parastinê yên Medyayê gihiştiye şehadetê. Bi boneya yadkirina heval Zîlan em weke rêhevalên wan di serî de ji malbata me ya hêja û tevahî gelê me yê welatparêz re sersaxiyê dixwazin, soza emê teqez armanc û xeyalên wan di Kurdistaneke azad de pêkbînin didin.
Zîlan BOKAN di sala 1989´an de li herêma Rewandûzê, li gundê Kesre Mawnan jidayîk dibe. Ji Eşîra Balakateyî ye. Malbata di navê de mezin dibe xwediyê xisletekî qedîm ê welatparêziyê ya gelê yê Başûrê Kurdistanê ye. Heval Zîlan di navenga vê malbatê de mezin dibe. Bi çanda Kurdeweriyê digihe û dibe jineke ciwan a çalak. Dema digihêje temenê ciwantiyê di sala 2002´yan de ji Rewandûz´ê beşdarî nav refên Gerîla dibe. Wê çaxê temenê wê biçûk e, ji lewra heta 2004´an di tabûrên ciwanan de dimîne, tevlê xebatên ciwanan dibe. Hevala me Zîlan BOKAN di demekî dihat xwestin Tevgera Azadiya Kurdistanê PKK bê tasfiyekirin, hêviyên gelê Kurd ên azadiyê bên şikandin de weke jineke ciwan xwe dispêre stargehên qewîn çiyayan. Dema gelek kesan xweziya xwe bi bermahiyên jiyana peregalê tanîn û ji nav refên azadiyê qutdibûn hevala Zîlan weke helwesteke tund dikeve ser rêya gerîlabûnê. Weke jinekê jiyana civak li ser ferz dike napejirîne, dixwaze di Başûrê Kurdistanê de bibe pêşengeke xurt a avakirina civakeke azad, di hilweşandina paşverûtiyan de bibe findek. Paşê derbasî HPG´ê dibe. Li qadên weke Xinêrê, Xakurkê, Metîna, Heftanînê dimîne. Heta sala 2010´an li van herêman tevlî pratîka gerîlacîtiyê dibe, erkên heya weke fermandariya taximê radike. Kesekê rûbiken, çalak û fehma ye. Ji bo xwe di warê bîrdozî û rêxistinî de pêşbixe beşdarî navengên perwerdeyê dibe. Di PKK´ê de jiyan bi xwe qada herî xurt a perwerdeyê ye, heval Zîlan jî di nav herikîna demê de ji jiyanê gelek ezmûnan digire. Di Akademiya Şehîd Bêrîtan û Akademiya Şehîd Nûda de dewreyên perwerdeya îdeolojîk û rêxistinî dibîne. Di vê çarçoveyê de hewildaneke xurt a xwe pêşxistinê raber dike. Li hemberî ferzkirinên civaka kevneşop weke jinekê li bilindahiya çiyayan hilberîna jiyaneke azad coş û heyecaneke cuda bi heval Zîlan re pêşdixe. Weke her gerîlaya azadiya Kurdistanê xeyala hevala Zîlan jî ew bû ku dagirkirina xakên welat bidawî bike. Ji bo vê xeyala xwe pêkbîne salên dirêj têkoşîneke bênavber dimeşîne.
Hevala me Zîlan Bokan di 17´ê Çileya 2011´an de li Herêmên Parastinê yên Medyayê digihêje şehadetê. Em di şexsê hevala Zîlan de hemû şehîdên şoreşê bi rêzdarî û bi minet bibîrtînin, soza biserxistina armanc û xeyalên şehîdên nemir nû dikin. Heta ku li bilindahiyên çiyayên Kurdistanê rûyên biken ên jinên azad rengvedin wê azadî teqez biserkeve.
Komîteya Piştgiriya Bi Malbatên Şehîdan Re ya PKK´ê ya Başûr
WÊNE
